【台語世界／錄音】露營 Lō͘-iâⁿ

文、錄音／Liân Chu-bî

阿鳳阿姑hit-kang ùi學校tńg- -lâi了後，kui-kang人tō gōng-sîn gōng-sîn！飯mā食bē-lo̍h， 暗時一个人koh會se̍h-se̍h念。 阿媽提阿鳳阿姑ê衫仔褲khì pî-á-piⁿ ê阿婆hia siak鹽米，m̄-koh人mā是siān-siān。Góa看阿姑可能hō͘-lâng驚- -tio̍h，thàn大人無tī leh，假鬼假怪kóng beh kā收驚。

「厝頂公，厝頂婆，îⁿ-lìn-lìn，天頂水、厝頂水二个相kap，hō͘囡仔人chia̍h入肚，bē tio̍h chheⁿ驚。」Góa一个囡仔phí，neh 腳尾，kā水khok-á ê水潑khì低厝仔ê厝頂，接紲koh se̍h三个lin-long。水tap-tap tih-tih流- -落-來，我趕緊用水 khok-á去sîn，thô͘-kha ê水tō用六雙箸ùn一寡仔khí-lâi水khok-á。Góa kā阿鳳阿姑ê胸坎loa̍h三下，koh hō͘ i tam水三嘴。阿鳳阿姑bîn-bîn又koh倒落來睏。

阿媽講隔壁ê國富阿叔已經三kang無tńg- -lâi，in-tau ê人報警察iah bōe ū消息。M̄-koh 我 cha-mê起來pàng尿，ū看tio̍h國富阿叔tī in tau ê nî-chîⁿ 腳leh 弄狗仔。阿媽講我烏白講，若ū tńg- -lâi，暗時thài無聽tio̍h狗仔聲。

Hit暗，阿鳳阿姑睏醒，kā 我 kiò-khì房間，偷偷仔kā 我 kóng，i頂禮拜chio 國富阿叔作夥走學，kap同窗騎o͘-tó͘-bái去山頂露營。山腳iáu-koh teh出日，m̄-koh 山頂soah雷公sih-nah。一陣人lóng總五个，趕緊chhōe所在搭布帆歇睏，等雨停。

到欲暗á，風雨iáu-bōe thêng，山頂ná來ná寒，其中一个cha-po͘囡仔阿強，i是阿鳯阿姑ê同學，講萬不二nā崩山，所有ê人ē hō͘魔神仔掠khì作交替，永遠tī山頂做鬼。外口ê風hiù-hiù叫，in ná想ná驚。阿強、國富阿叔kap國富阿叔ê麻吉阿清仔三个cha-po͘=ê，tō beh先探路，叫阿鳳阿姑kap i ê姊妹仔伴阿淑仔in二人tī布帆內底作伴，mài烏白走，等in tńg來。

時間一久，阿鳳阿姑等kah心肝頭phi̍h-pho̍k-chhái，講i beh出去chhōe hia- -ê cha-po͘=ê。阿淑仔kā 講 ＂你人瘦koh薄板，會 hō͘ 風ká去天頂。風khah細ê時陣，我才來chhōe。＂阿淑仔bô gōa久，準備beh khì chhōe，交代阿鳳阿姑 m̄-thang出去，bô nā kap國富阿叔sio-chhut-lō͘，會chhōe無人。

阿鳳阿姑一个人守tī布帆內底，不時hō͘ 風雨siàn kah強beh péng-kiān，外口koh ū奇怪ê動物叫聲，驚kah phi̍h-phi̍h-chhoah。一tiap-á久，國富阿叔in三个 cha-po͘=ê tńg- -lâi à。

「Goán chhōe-tio̍h 路，會 tàng 落山ah。咦，阿淑仔leh，nà 會無看見？」「I khì chhōe=lín，kám-kóng lín 無tn̄g- -tio̍h？」

In三个人kui身軀lóng是lo̍k-kô͘-á糜，澹kô͘-kô͘，面koh烏sô-sô。

國富阿叔 chiok 緊張講＂hāi=à，tú才goán有聽tio̍h山崩去ê聲，koh ū人唉一聲，chiok大聲，可能是阿淑仔hō͘ tâi-lo̍h-khì à！Goán來看māi leh！＂

In三个人走了後，又koh留阿鳳阿姑一个人。佳chài！風雨漸漸停à。天phah-phú-á光ê時，外口敢若有人teh叫，chiok細聲。「鳳阿，鳳阿…」

Kui暗lóng無睏ê 阿鳳阿姑講，i看tio̍h阿淑仔kui身軀chhè傷，流血流滴，徛bē chhāi。I oa̍h beh驚死，目睭kheh-kheh kā問，「你是人，iah是鬼？國富仔說你tú才hō͘-thô͘ tâi-tī山腳à。」Kóng煞tō m̄-chai人。

國富阿叔飼ê hit隻狗，有tang-sî-á tī暗時敢若有人teh kā弄，chhiâng-chāi thiaⁿ-tio̍h狗仔「hiⁿ-hiⁿ-hiⁿ」sai-nai ê聲。

台灣字（白話字）版

A-hōng a-ko͘ hit-kang ùi ha̍k-hāu tńg- -lâi liáu-āu, kui-kang lâng tō gōng-sîn gōng-sîn, mā chia̍h bē-lo̍h, àm-sî chi̍t-ê lâng koh ē se̍h-se̍h-liām. A-má the̍h A-hōng a-ko͘ ê saⁿ-á-khò͘ khì pî-á-piⁿ ê a-pô hia siak iâm-bí, m̄-koh lâng mā-sī siān-siān. Góa khòaⁿ a-ko͘ khó-lêng hō͘-lâng kiaⁿ- -tio̍h, thàn tōa-lâng bô tī leh, ké-kúi ké-koài kóng beh kā siu-kiaⁿ.

“Chhù-téng kong, chhù-téng pô, îⁿ-lìn-lìn. Thiⁿ-téng chúi, chhù-téng chúi nn̄g-ê sio-kap, hō͘ gín-á lâng chia̍h-ji̍p tó͘, bē tio̍h chheⁿ-kiaⁿ.” Góa chi̍t-ê gín-á phí, neh kha-bóe, kā chúi-khok-á ê chúi phoah-khì kē-chhù-á ê chhù-téng. Chiap-sòa koh se̍h saⁿ-ê lin-long. Chúi tap-tap tih-tih lâu- -lo̍h-lâi. Góa kóaⁿ-kín iōng chúi-khok-á khì sîn, thô͘-kha ê chúi tō iōng la̍k-siang tī ùn chi̍t-kóa-á khí-lâi chúi-khok-á. Góa kā A-hōng a-ko͘ ê heng-khám loa̍h saⁿ-ē, koh hō͘ i tam saⁿ-chhùi. A-hōng a-ko͘ bîn-bîn iū koh tó-lo̍h-lâi khùn.

A-má kóng keh-piah ê Kok-hù a-chek í-keng saⁿ-kang bô tńg- -lâi. In-tau ê lâng pò kéng-chhat iah bōe ū siau-sit. M̄-koh góa cha-mê khí-lâi pàng-jiō, ū khòaⁿ-tio̍h Kok-hù a-chek tī in tau ê nî-chîⁿ kha leh lāng káu-á. A-má kóng góa o͘-pe̍h kóng, nā ū tńg- -lâi, àm-sî thài bô thiaⁿ-tio̍h káu-á-siaⁿ.

Hit-àm, A-hōng a-ko͘ khùn-chhéⁿ, kā góa kiò-khì pâng-keng. Thau-thau-á kā góa kóng, i téng lé-pài chio Kok-hù a-chek chò-hóe cháu-o̍h, kap tông-chhong khiâ o͘-tó͘-bái khì soaⁿ-téng lō͘-iâⁿ. Soaⁿ-kha iáu-koh teh chhut-ji̍t, m̄-koh soaⁿ-téng soah lûi-kong sih-nah. Chi̍t-tīn lâng lóng-chóng gō͘-ê, kóaⁿ-kín chhōe só͘-chāi tah pò͘-phâng hioh-khùn, tán hō͘ thêng.

Kàu beh àm-á, hong-hō͘ iáu-bōe thêng, soaⁿ-téng ná-lâi ná-kôaⁿ. Kî-tiong chi̍t-ê cha-po͘ gín-á A-kiông, i sī A-hōng a-ko͘ ê tông-o̍h; kóng bān-put-jī nā pang-soaⁿ, só͘-ū ê lâng ē hō͘ mô͘-sîn-á lia̍h-khì chò kau-thè, éng-oán tī soaⁿ-téng chò-kúi. Gōa-kháu ê hong hiù-hiù kiò, in ná-siūⁿ ná-kiaⁿ. A-kiông, Kok-hù a-chek kap Kok-hù a-chek ê má-chih A-chheng=á saⁿ-ê cha-po͘=ê, tō beh seng thàm-lō͘; kiò A-hōng a-ko͘ kap i ê chí-mōe-á phōaⁿ A-siok=á in nn̄g-lâng tī pò͘-phâng lāi-té chò-phōaⁿ, mài o͘-pe̍h cháu, tán in tńg- -lâi.

Sî-kan chi̍t-kú, A-hōng a-ko͘ tán kah sim-koaⁿ-thâu phi̍h-pho̍k-chhái, kóng i beh chhut-khì chhōe hia- -ê cha-po͘=ê. A-siok=á kā kóng, “lí lâng sán koh po̍h-pán, ē hō͘ hong ká-khì thiⁿ-téng. Hong khah sè ê sî-chūn, góa chiah lâi-chhōe.＂A-sio̍k=á bô gōa kú, chún-pī beh khì chhōe, kau-tài A-hōng a-ko͘ m̄-thang chhut- -khì, bô nā kap Kok-hù a-chek sio-chhut-lō͘, ē chhōe bô-lâng.

A-hōng a-ko͘ chi̍t-ê lâng chiú tī pò͘-phâng lāi-té, put-sî hō͘ hong-hō͘ siàn kah kiông beh péng-kiān. Gōa-kháu koh ū kî-koài ê tōng-bu̍t kiò siaⁿ, kiaⁿ kah phi̍h-phi̍h-chhoah. Chi̍t-tiap-á kú, Kok-hù a-chek in saⁿ-ê cha-po͘=ê tńg- -lâi à.

“Goán chhōe-tio̍h lō͘, ē tàng lo̍h-soaⁿ à. Ĭ, A-siok=á leh, ná ē bô khòaⁿ- -kìⁿ?” “I khì chhōe=lín, kám-kóng lín bô tn̄g- -tio̍h?”

In saⁿ-ê lâng kui sin-khu lóng sī lo̍k-kô͘-á moâi, tâm-kô͘-kô͘, bīn koh o͘-sô-sô.

Kok-hù a-chek chiok kín-tiuⁿ kóng, “hāi=à, tú chiah goán ū thiaⁿ-tio̍h soaⁿ pang- -khì ê siaⁿ, koh ū lâng ai chi̍t-siaⁿ, chiok tōa-siaⁿ, khó-lêng sī A-siok=á hō͘ tâi- -lo̍h-khì à! Goán lâi khòaⁿ-māi leh!”

In saⁿ-ê lâng cháu liáu-āu, iū koh lâu A-hōng a-ko͘ chi̍t-ê lâng. Ka chài! Hong-hō͘ chiām-chiām thêng à. Thiⁿ phah-phú-á kng ê sî, gōa-kháu káⁿ-ná ū-lâng teh kiò, chiok sè-siaⁿ. “Hōng=á, Hōng=á…”

Kui-àm lóng bô-khùn ê A-hōng a-ko͘ kóng, i khòaⁿ-tio̍h A-siok=á kui sin-khu chhè-siong, lâu-hoeh-lâu-tih, khiā bē chhāi. I oa̍h beh kiaⁿ- -sí, ba̍k-chiu kheh-kheh kā mn̄g, “lí sī lâng, iah sī kúi? Kok-hù=á kóng lí tú chiah hō͘-thô͘ tâi-tī soaⁿ-kha à!” Kóng-soah tō m̄-chai lâng.

Kok-hù a-chek chhī=ê hit-chiah káu, ū tang-sî-á tī àm-sî káⁿ-ná ū-lâng teh kā lāng, chhiâng-chāi thiaⁿ-tio̍h káu-á “hiⁿ-hiⁿ-hiⁿ” sai-nai ê siaⁿ.

讀hōo你聽

點擊觀看 YouTube 影片

銳傳媒官方網站
https://vigormedia.tw/

銳傳媒Facebook
https://www.facebook.com/vigormedia.tw