【台語世界／錄音】阮ê故鄉─台南

文、錄音／鄭貝如 (Tēⁿ, Pòe Jû)

台南是台灣歷史上誠重要ê城市，mā是足濟人心目中ê文化古都。Chit ê所在有豐富ê歷史、古早ê建築，koh有出名ê好料的，m̄管是在地人抑是外地ê旅客，lóng會hō͘台南ê魅力深深吸引。

台南有誠濟古蹟，親像安平古堡、赤崁樓、孔廟等等，lóng見證台灣幾百冬來ê發展。行tī古蹟內底，m̄-nā ē-tàng欣賞古早建築ê特色，mā ē-tàng了解台灣歷史ê變化，hō͘人感覺親像行入時空磅空仝款。

講tio̍h台南，tō一定ài講tio̍h好料的。台南人ê口味khah愛食甜，牛肉湯、擔仔麵、碗粿、蝦捲、棺材板、虱目魚糜lóng是誠出名ê點心。尤其是透早現刣ê牛肉湯，kap 一碗白飯，tō是誠濟人一工ê開始。行tī台南ê大街小巷，四界lóng有古早味ê點心，hō͘人食一擺to̍h會想beh koh-chài來。

除了歷史kap好料的以外，台南ê人情味mā是誠大ê特色。台南人普遍誠熱情，若是旅客m̄知路，誠濟人lóng會主動kā指引。Chit款親切ê態度，hō͘人感覺誠溫暖，mā是台南hō͘人留落深刻印象ê重要原因。

台南mā有足chē自然景點，親像四草綠色磅空、七股鹽山、漁光島等，lóng合規家大細做伙出外𨑨迌。坐竹棑欣賞紅樹林、生態景觀，抑是去海邊仔看日落，lóng ē-tàng放冗心情，享受大自然ê美麗。

總講一句，台南是一座結合歷史、文化、好料的kap自然風景ê城市。伊m̄-nā是台灣歷史ê起點，mā保存誠濟珍貴ê文化資產。若有機會來台南𨑨迌，m̄-nā ē-tàng食tio̍h好食ê在地料理，koh ē-tàng感受厚厚ê人情味kap文化氣息。我相信，每位來過台南ê人，lóng會ài tio̍h chit座有故事、有溫度ê城市，mā會向望後擺koh來台南，繼續發現伊無仝款ê美麗。

台灣字（白話字）版

Goán ê kò͘-hiong-Tâi-lâm

Tâi-lâm sī Tâi-oân le̍k-sú siōng chiâⁿ tiōng-iàu ê siâⁿ-chhī, mā sī chiok chōe-lâng sim-bo̍k-tiong ê bûn-hòa kó͘-to͘. Chit ê só͘-chāi ū hong-hù ê le̍k-sú, kó͘-chá ê kiàn-tiok, koh ū chhut-miâ ê hó-liāu- -ê. M̄-koán sī chāi-tē-lâng ia̍h-sī gōa-tē ê lú-khek, lóng ē hō͘ Tâi-lâm ê bī-le̍k chhim-chhim khip-ín.

Tâi-lâm ū chiâⁿ chē kó͘-chek, chhin-chhiūⁿ An-pêng Kó͘-pó, Chhiah-khàm-lâu, Khóng-biō téng-téng, lóng kiàn-chèng Tâi-oân kúi-pah tang lâi ê hoat-tián. Kiâⁿ tī kó͘-chek lāi-tóe, m̄-nā ē-tàng him-sióng kó͘-chá kiàn-tiok ê te̍k-sek, mā ē-tàng liáu-kái Tâi-oân le̍k-sú ê piàn-hòa, hō͘ lâng kám-kak chhin-chhiūⁿ kiâⁿ-ji̍p sî-khong pōng-khang kāng-khoán.

Kóng tio̍h Tâi-lâm, to̍h it-tēng ài kóng-tio̍h hó-liāu- -ê. Tâi-lâm-lâng ê kháu-bī khah phian tiⁿ, gû-bah-thng, tàⁿ-á-mī, óaⁿ-kóe, hê-kńg, koaⁿ-châi-pán, sat-ba̍k-hî-moâi lóng sī chiâⁿ chhut-miâ ê tiám-sim. Iû-kî sī thàu-chá hiān-thâi ê gû-bah-thng, kap chi̍t óaⁿ pe̍h-pn̄g, tō sī chiâⁿ chē lâng chi̍t kang ê khai-sí. Kiâⁿ tī Tâi-lâm ê tōa-ke-sió-hāng, sì kè lóng-ū kó͘-chá-bī ê tiám-sim, hō͘ lâng chia̍h chi̍t pái tō ē siūⁿ beh koh chài lâi.

Tû-liáu le̍k-sú kah hó-liāu- -ê í-gōa, Tâi-lâm ê jîn-chêng-bī, mā sī chiâⁿ-tōa ê te̍k-sek. Tâi-lâm-lâng phó͘-phiàn chiâⁿ jia̍t-chêng, nā-sī lú-khek m̄-chai lō͘, chiâⁿ chē-lâng lóng ē chú-tōng kā chí-ín. Chit khoán chhin-chhiat ê thāi-tō͘, hō͘ lâng kám-kak chiâⁿ un-loán, mā sī Tâi-lâm hō͘ lâng lâu-lo̍h chhim-khek ìn-siōng ê tiōng-iàu goân-in.

Tâi-lâm mā ū chiok chē chū-jiân kéng-tiám, chhin-chhiūⁿ Sì-chhó le̍k-sek pōng-khang, Chhit-kó͘ iâm-soaⁿ, Hî-kong-tó téng, lóng ha̍h kui-ke tōa-sè chòe-hé chhut-gōa chhit-thô. Chē tek-pâi him-sióng âng-chhiū-nâ, seng-thài kéng-koan, ia̍h-sī khì hái-piⁿ-á khòaⁿ ji̍t-lo̍h, lóng ē-tàng pàng-lēng sim-chêng, hióng-siū tāi-chū-jiân ê bí-lē.

Chóng kóng chi̍t kù, Tâi-lâm sī chi̍t chō kiat-ha̍p le̍k-sú, bûn-hòa, hó-liāu- -ê kah chū-jiân hong-kéng ê siâⁿ-chhī. I m̄-nā sī Tâi-oân le̍k-sú ê khí-tiám, mā pó-chûn chiâⁿ chē tin-kùi ê bûn-hòa chu-sán. Nā ū ki-hōe lâi Tâi-lâm chhit-thô, m̄-nā ē-tàng chia̍h tio̍h hó-chia̍h ê chāi-tē liāu-lí, koh ē-tàng kám-siū kāu-kāu ê jîn-chêng-bī kap bûn-hòa khùi-sek. Góa siong-sìn, múi chi̍t ūi lâi kòe Tâi-lâm ê lâng, lóng ē ài tio̍h chit chō ū kò͘-sū, ū un-tō͘ ê siâⁿ-chhī, mā ē ǹg-bāng āu-pái koh lâi Tâi-lâm, ké-sio̍k hoat-hiān i bô-kāng-khoán ê bí-lē.

讀hōo你聽

[embed]https://youtu.be/2GMRPx2CFUs[/embed]