【台語世界／錄音】Hō͘心肝仔囝ê一張批

文、錄音／秦佳慧（Chîn Ka Hūi）

心愛 ê寶貝，
昨昏送你去坐高鐵了後，轉- -來ê時陣阿母行m̄著路- -去。阿母開kan-na賰12%電力ê車，往阿蓮ê方向，se̍h kàu關廟。阿母心內足驚惶ê，決定先到歇睏站充電。

好佳哉關廟歇睏站有充電站，阿母koh tī日頭下腳設定手機仔APP，舞規晡，總算ē-tàng充電à。
阿母趁車leh充電ê時陣去piⁿ=á ê 7-11啉咖啡食早頓。不到十分鐘電著充好à。車充電à，阿母放心à，冷靜落來，koh再起行。駛bô kah半點鐘to̍h順利到厝à.。

人生ê路，難免會行m̄著路。行m̄著路ê時陣，先hō͘家己冷靜- -落-來，chhōe所在歇睏一下，充飽電才koh上路。koh再確定方向，自然tō ē轉來正確ê路。

上hō͘人煩惱 ê 是，chhōe無家己ê方向，甚至m̄知影家己行m̄著路， kan-na會gōng-gōng-á tòe人ê指示烏白行， án-ne永遠無法度到家己欲去ê所在。

Chit 禮拜你ài上台北參加全國比賽。阿母知影你準備chiâⁿ久，知影你足向望著名ê，阿母想著Chi̍t-ê故事kap你分享：

久久進前，阿母有一位學生參加全國比賽，可惜無著名。伊足失志ê！當伊tńg學校時kā我講：「老師，我感覺我做全國比賽選手根本leh討債時間！這馬除了hō͘人笑之外，提出課本chiah發現家己已經輸逐家真濟矣。」

我安慰伊，所有拍拚lóng bē了！這馬準備考試mā猶bē siuⁿ慢，靜心好好á拍拚，相信會看著家己ê成果。無偌久，伊果然順利考牢高雄科技大學，大學畢業了後順利去美商公司上班。

當伊koh tńg高中演講ê時陣，大家lóng足欣羨伊一畢業to̍h chhōe著好頭路。伊講伊只是運氣較好，因為leh面試ê時陣，面試官tùi伊參加全國比賽ê過程足有興趣ê，規个過程lóng leh問伊參加全國比賽ê過程，拄著ê困難kah成果。因為伊開真濟精神tī比賽，所以伊mā因為按呢得著chit份人人欣羨ê頭路。

阿母想beh kā你講ê是，逐个人tùi家己ê投資lóng bē了。天公無的確bē liâm-mi hō͘你獎賞，m̄過所有累積ê經驗lóng是你成長ê養份。Chia-ê養份，終其尾有開花結果ê一工！因為你m̄知影，天公beh hō͘你ê獎賞是全國賽頭名？抑是一份好頭路？

所以這擺比賽無論結果按怎，阿母相信你ê拍拚終其尾會予天公看見！

加油矣！寶貝！向望你收成滿滿！

永遠愛你ê阿母

台灣字（白話字）版
Hō͘ sim-koaⁿ-á-kiáⁿ ê chi̍t tiuⁿ phoe

Sim-ài ê pó-pòe,
Cha-hng sàng lí khì chē ko-thih liáu-āu, tńg- -lâi ê sî-chūn A-bú kiâⁿ-m̄-tio̍h lō͘- -khì. A-bú khui kan-na chhun 12 % tiān-le̍k ê chhia, óng A-lian ê hong-hiòng, se̍h kàu Koan-biō. A-bú sim lāi chiok kiaⁿ-hiâⁿ=ê, koat-tēng seng kàu hioh-khùn-chām chhiong-tiān.

Hó-ka-chài Koan-biō hioh-khùn-chām ū chhiong-tiān-chām. A-bú koh tī ji̍t-thâu ē-kha siat-tēng chhiú-ki-á APP, bú kui-po͘, chóng-sǹg ē-tàng chhiong-tiān- -à.

A-bú thàn chhia leh chhiong-tiān ê sî-chūn khì piⁿ=á ê 7-11 lim ka-pi chia̍h chá-tǹg. Bô-kàu cha̍p hun-cheng tiān tō chhiong-hó à. Chhia chhiong-tiān=à, A-bú hòng-sim=à. Léng-chēng- -lo̍h-lâi, koh-chài khí-kiâⁿ. Sái bô kah pòaⁿ tiám-cheng to̍h sūn-lī kàu chhù à.

Jîn-seng ê lō͘, lân-bián ē kiâⁿ-m̄-tio̍h lō͘ . Kiâⁿ-m̄-tio̍h lō͘ ê sî-chūn, seng hō͘ ka-kī léng-chēng- -lo̍h-lâi, chhōe só͘-chāi hioh-khùn- -chi̍t-ē, chhiong-pá tiān chiah-koh chiūⁿ-lō͘. Koh-chài khak-tēng hong-hiòng, chū-jiân tō ē tńg-lâi chèng-khak ê lō͘.

Siōng hō͘ lâng hoân-ló- -ê sī, chhōe-bô ka-kī ê hong-hiòng. Sīm-chì m̄ chai-iáⁿ ka-kī kiâⁿ-m̄-tio̍h lō͘; kan-na ē gōng-gōng á tòe lâng ê chí-sī o͘-pe̍h kiâⁿ. Án-ne éng-oán bô-hoat-tō͘ kàu ka-kī beh khì ê só͘-chāi.

Chit lé-pài lí ài chiūⁿ Tâi-pak chham-ka choân-kok pí-sài. A-bú chai-iáⁿ lí chún-pī chiâⁿ-kú, chai-iáⁿ lí chiok ǹg-bāng tio̍h-miâ=ê. A-bú siūⁿ-tio̍h chi̍t-ê kò͘-sū kah lí hun-hióng：

Kú-kú chìn-chêng, a-bú ū chi̍t ūi ha̍k-seng chham-ka choân-kok pí-sài. Khó-sioh bô tio̍h-miâ. I chiok sit-chí- -ê! Tng i tńg ha̍k-hāu ê sî kā góa kóng: "Lāu-su, góa kám-kak góa chò choân-kok pí-sài soán-chhiú kin-pún leh thó-chè sî-kan! Chit-má tû-liáu hō͘ lâng chhiò chi-gōa, the̍h-chhut khò-pún, chiah hoat-hiān ka-kī í-keng su ta̍k-ke chin chē=à."

Góa an-ùi i, só͘-ū phah-piàⁿ lóng bē-liáu! Chit-má chún-pī khó-chhì mā iáu bē siuⁿ bān! Chēng-sim hó-hó-á phah-piàⁿ, siong-sìn ē khòaⁿ-tio̍h ka-kī ê sêng-kó. Bô-gōa-kú, i kó-jiân sūn-lī khó-tiâu Ko-hiông Kho-ki Tāi-ha̍k! Tāi-ha̍k pit-gia̍p liáu-āu sūn-lī khì Bí-siong kong-si siōng-pan.

Tng i koh tńg ko-tiong ián-káng ê sî-chūn, ta̍k-ke lóng chiok him-siān i chi̍t pit-gia̍p to̍h chhōe-tio̍h hó thâu-lō͘. I kóng i chí-sī ūn-khì khah hó! In-ūi leh biān-chhì ê sî-chūn, biān-chhì-koaⁿ tùi i chham-ka choân-kok pí-sài ê kòe-têng chiok ū hèng-chhù=ê. Kui-ê kòe-têng lóng leh mn̄g i chham-ka choân-kok pí-sài ê kòe-têng, tú- -tio̍h ê khùn-lân kah sêng-kó. In-ūi i khai chin chē cheng-sîn tī pí-sài, só͘-í i mā in-ūi án-ne tit-tio̍h chit hūn lâng-lâng him-siān ê thâu-lō͘.

A-bú siūⁿ beh kā lí kóng- -ê sī, ta̍k ê lâng tùi ka-kī ê tâu-chu lóng bē-liáu. Thiⁿ-kong bô-tek-khak bē liâm-mi hō͘ lí chióng-siúⁿ, m̄-koh só͘-ū lúi-chek ê keng-giām lóng sī lí sêng-tióng ê ióng-hūn. Chiah-ê ióng-hūn, chiong-kî-bóe ū khui-hoe kiat-kó ê chi̍t kang! In-ūi lí m̄ chai-iáⁿ, thiⁿ-kong beh hō͘ lí ê chióng-siúⁿ sī choân-kok-sài thâu-miâ, ia̍h-sī chi̍t hūn hó thâu-lō͘ ?

Só͘-í lí chit-pái choân-kok pí-sài bô-lūn kiat-kó án-chóaⁿ, a-bú siong-sìn lí ê phah-piàⁿ chiong-kî-bóe ē hō͘ Thiⁿ-kong khòaⁿ- -kìⁿ!

Ka-iû- -ah! pó-pòe! Ǹg-bāng lí siu-sêng móa-móa!

Éng-oán ài—lí ê a-bú

讀hōo你聽

[embed]https://youtu.be/N2FdczPR3cA[/embed]