文、錄音／陳俐雯 Tân Lī-bûn
Tī細漢若天猶bē光著hông挖- -起來，是因為輪著愛kah爸母去做生理。囡仔人khah重眠，kiàn若beh按眠床頂peh- -起來，he場面就像鼎底煎kah臭火焦ê魚仔仝款sian thuh就thuh bē起- -來，上尾ah是愛阿毋攑煎匙出馬才有法度收煞。窗仔外天色iáu暗眠摸，亂鐘仔一tân規个人隨按眠床頂tiô- -起來！透早beh kap老爸做伙遊覽ê因端，驚òaⁿ到會坐無著車用上猛掠ê跤手一時仔就款好勢，天才拍phú仔光o͘-tó͘-bái騎leh緊出門。記持中老爸做生理真少歇睏，有一擺我kah老爸開講無意中講tio̍h細漢伊攏無chhōa阮遮ê囡仔出去chhit-thô，想bē到伊應講：「我駛車載恁四界做生理就是teh chhit-thô a。」Hit時才知影原來阮Pâ是一个「工課痟」，是阮對伊ê了解無夠深。想bē到目一𥍉老爸已經85歲à，阮爸仔囝才第一擺beh做伙去遊覽。
老爸是上尾站才上車ê，車來到台南遠遠就看伊手捾幾ā ê袋仔，看- -來是chhoân bē少食物，真正有sêng學生仔beh去遠足。才拄上車老爸嘴笑目笑無閒kah朋友相借問。我做伊ê查某囝hiah久今仔日算是見識著阮Pâ ê好人緣。
這chōa beh去台中遊覽，第一站來到雲林蓋有名ê秘境看落羽松。雖罔已經是11- -月，天氣猶是熱kah若火爐，規區落羽松逐欉攏青lèng-lèng，無緣看著葉仔變色ê美景chiâⁿ可惜。M̄-kú第一擺kap老爸遊覽當然愛加hip寡相做紀念，手機仔提- -leh隨變做攝影師，在場chia幾个古錐老人lóng是我鏡頭內上gió-toh ê model。下晡挽椪柑，tī果子園腹肚貯會落—ê lóng免錢，食拄- -ê。老爸是果子bâ，果子較濟to食- -落，眼前ê柑仔園hō͘老爸目睭lóng金- -起來，伊剪仔捎- -leh勻勻仔是寬寬仔相，bē輸teh揀新婦仝款，莫怪伊剪ê逐粒to甜koh飽水。無一睏仔老爸籃仔內ê椪柑就超磅à。
[caption id="attachment_90838" align="alignnone" width="1196"]
老爸剪仔捎- -leh勻勻仔是寬寬仔相，伊剪ê逐粒to甜koh飽水。圖／作者陳俐雯提供[/caption]
老爸興唱歌，暗頓食煞有伊上佮意ê娛樂，唱卡拉OK。伊專工chah一罐高粱beh來參我lim，雖罔我酒量無好mā是加減kap老爸sánlim二- -杯à。盈暗阮爸仔囝歌那唱酒那sip，hō͘焦啦！敬美好歲月永遠唱hit條「阿pah ê身體永遠勇kah若山」。
台灣字（白話字）版
Tē-it-pái Kap Lāu-pē Iû-lám
Tī sè-hàn nā thiⁿ iáu-bē kng tio̍h hông ó͘- -khí-lâi, sī in-ūi lûn tio̍h ài kah pē-bú khì chò-seng-lí. Gín-á-lâng khah tiōng-bîn, kiàn-nā beh àn bîn-chhn̂g téng peh- -khí-lâi, he tiûⁿ-bīn tō chhiūⁿ tiáⁿ té chian kah chhàu-hóe-ta ê hî-á kāng-khoán sian thuh to thuh bē khí- -lâi! Siōng-bóe ah sī ài a-bú gia̍h chian-sî chhut-má chiah ū hoat-tō͘ siu-soah. Thang-á gōa thiⁿ-sek iáu àm-bîn-bong, loān-cheng-á chi̍t tân kui-ê lâng sûi àn bîn-chhn̂g téng tiô- -khí-lâi! Thàu-chá beh kap lāu-pē chò-hóe iû-lám ê in-toaⁿ, kiaⁿ òaⁿ kàu ē chē bô tio̍h chhia iōng siōng mé-lia̍h ê kha-chhiú chi̍t-sî-á tō khóan hó-sè, thiⁿ chiah phah-phú-á-kng o͘-tó͘-bái khiâ leh kín chhut-mn̂g. Kì-tî tiong lāu-pē chò-seng-lí chin chió hioh-khùn. Ū chi̍t-pái góa kah lāu-pē khai-káng bô-ì-tiong kóng tio̍h sè-hàn i lóng bô chhōa gún chia-ê gín-á chhut-khì chhit-thô. Siūⁿ-bē-kàu i ìn kóng: “Góa sái-chhia chài lín sì-kè chò-seng-lí tō sī teh chhit-thô a.” Hit-sî chiah chai-iáⁿ goân-lâi gún pâ sī chi̍t-ê “khang-khòe siáu”, sī gún tùi i liáu-kái bô-kàu chhim. Siūⁿ-bē-kàu ba̍k-chi̍t-nih lāu-pē í-keng 85 hòe à, gún pē-á-kiáⁿ chiah tē-it-pái beh chò-hóe khì iû-lám.
Lāu-pē sī siōng-bé chām chiah chiūⁿ-chhia ê, chhia lâi kàu Tâi-lâm hn̄g-hn̄g tō khòaⁿ i chhiú kōaⁿ kúi-ā-ê tê-á, khòaⁿ- -lâi sī chhoân bē-chió chia̍h-mi̍h, chin-chiàⁿ ū sêng ha̍k-seng-á beh khì oán-chiok. Chiah tú chiūⁿ-chhia lāu-pē chhùi-chhiò-ba̍k-chhiò bô-êng kah pêng-iú sio-chioh-mn̄g. Góa chò i ê cha-bó͘-kiáⁿ hiah kú kin-á-ji̍t sǹg sī kiàn-sek tio̍h gún pâ ê hó lâng-iân.
Chit-chōa beh khì Tâi-tiong iû-lám, tē-it chām lâi kàu Hûn-lîm kài ū-miâ ê pì-kéng khòaⁿ lo̍k-ú-chhêng. Sui-bóng í-keng sī 11- -goe̍h, thiⁿ-khì iáu-sī joa̍h kah ná hóe-lô͘, kui khu lo̍k-ú-chhêng ta̍k châng lóng chheⁿ-lèng-lèng. Bô-iân khòaⁿ-tio̍h hio̍h-á piàn-sek ê bí-kéng chiâⁿ khó-sioh. M̄-koh tē-it-pái kap lāu-pē iû-lám tong-jiân ài ke hip kóa siòng chò kì-liām! Chhiú-ki-á the̍h- -leh sûi piàn-chò liap-iáⁿ-su, chāi-tiûⁿ chia kúi-ê kó͘-chui lāu-lâng lóng sī góa kiàⁿ-thâu lāi siōng gió-toh ê model. Ē-po͘ bán phòng-kam, tī kóe-chí-hn̂g pak-tó͘ té ē lo̍h- -ê lóng bián-chîⁿ, chia̍h tú- -ê. Lāu-pē sī kóe-chí-bâ, kóe-chí khah-chē to chia̍h- -lo̍h! Gán-chêng ê kam-á-hn̂g hō͘ lāu-pē ba̍k-chiu lóng kim- -khí-lâi. I chián-á sa- -leh ûn-ûn-á-sī khoaⁿ-khoaⁿ-á siòng, bē-su teh kéng sin-pū kāng-khoán, bo̍k-koài i chián ê ta̍k-lia̍p to tiⁿ koh pá-chúi. Bô chi̍t-khùn-á lāu-pē nâ-á lāi ê phòng-kam tō chhiau-pōng ah.
Lāu-pē hèng chhiò-koa. Àm-tǹg chia̍h soah ū i siōng kah-ì ê gô͘-lo̍k, chhiò kha-lá-ó͘-khe. I choan-kang chah chi̍t-koàn ko-liâng beh lâi chham góa lim. Sui-bóng góa chiú-liōng bô-hó mā sī ke-kiám kap lāu-pē sán-lim nn̄g- -poe-à. Êng-àm gún pē-á-kiáⁿ koa ná chhiò chiú ná sip, hō͘ ta- -lah! Kèng bí-hó sòe-goa̍h éng-oán chhiò hit-tiâu “a-pah ê sin-thé éng-oán ióng kah ná soaⁿ”.
讀hōo你聽
[embed]https://youtu.be/wKNzWE0Qjzg?si=RIYycrzO-7p8KwTM[/embed]