【台語世界／錄音】世界叫出咱ê名

文／王淑珍、洪嘉品
錄音／王淑珍

柴山舊名打狗山，熱帶雨林硓𥑮石，
peh山看海做SPA，臺灣猴山仔來做伴。
碧海藍天西子灣，百年鐵路哈瑪星，
旗後古蹟有歷史，炮台燈塔媽祖宮。
泮水荷香蓮池潭，古早鳳山天然池，
龍虎塔、春秋閣kài出名，龜山、半屏山做cha̍h屏。

中央公園換頭面，美麗島站世界媠，
文化中心容貌易，生活美學無牆圍。
駁二藝術新特區，pha-hng倉庫做地基，
iap-thiap碼頭têng出世，充滿文化ê氣味。
旗津風車有人氣，環保發電排第一，
耍沙衝湧放風吹，海岸夕陽人人醉。

「衛武營」榕仔樹林來設計，厝尾頂銀色波浪chiâⁿ先進，
戲齣表演有底蒂，市民吟唱日常詩。
流行音樂中心新天地，珊瑚礁石造型像蜂siū，
暗時燈火閃閃爍，船港光iāⁿ好景緻。
輕鐵完工大箍圍，觀光通勤lóng便利，
新舊時代空間相串聯，nǹg過Totoro磅空ê青翠。
果嶺自然公園大手筆，球場開放全民來享受，
小山崙仔草仔埔青leng-leng，款待大家輕鬆好心情。

「大港開唱」音樂祭，台頂台腳喊hoah齊，
眾人走跳無歇ê汗水，透濫港都熱情鹹芳味。
演唱會一場sòa一場，精彩轟動無地比，
國際天團相爭來，萬千歌迷來相thīn。
黃色鴨咪仔流連愛河灣，àn-nāi遊客心花開，
「ちいかわ」有影真古錐，予人留落難忘ê記持。
「冬天遊樂園」變把戲，「超人力霸王」展風神，
恐龍、水怪來出入，大人囡仔lóng佮意。

早前工業汙染ê舊城市，變做chhiⁿ-chhioh體面ê新都市，
高雄觀光開眼界，chiâⁿ做國際ê舞台。
「無講武德」真豪邁，美麗轉身kài媠氣，
東西南北拓展- -開，迎向AI科技走百米。
認真phah-piàⁿ港都人，吸收海洋性命力，
心胸親像天地hiah-ni̍h闊，向望世界kāng心khiā相倚。
臺灣行- -出去！世界行倚- -來！
高雄港都上chhia-iāⁿ，世界叫出咱ê名！

台灣字（白話字）版

Sè-kài Kiò Chhut Lán ê Miâ

Chhâ-soaⁿ kū-miâ Táⁿ-káu-soaⁿ, jia̍t-tài ú-lîm ló͘-kó͘-chio̍h,
peh-soaⁿ khòaⁿ-hái chò SPA, Tâi-oân kâu-san-á lâi chòe-phōaⁿ.
Phek-hái nâ-thiⁿ Se-á-oân, pah-nî thih-lō͘ Há-má-seng,
Kî-āu kó͘-chek ū le̍k-sú, phàu-tâi teng-thah Má-chó͘-keng.
Phoàn-chúi hô-hiong Liân-tî-thâm, kó͘-chá Hōng-soaⁿ thian-jiân-tî,
Lêng-hó͘-thah Chhun-chhiu-koh kài chhut-miâ, Ku-soaⁿ Pòaⁿ-pîn-soaⁿ chò cha̍h-pîn.

Tiong-iong Kong-hn̂g ōaⁿ thâu-bīn, Bí-lē-tó-chām sè-kài-súi,
Bûn-hòa Tiong-sim iông-māu e̍k, seng-oa̍h bí-ha̍k bô chhiûⁿ-ûi.
Pok-jī gē-su̍t sin-te̍k-khu, pha-hng chhng-khò͘ chò tē-ki,
iap-thiap bé-thâu têng chhut-sì, chhiong-boán bûn-hòa ê khì-bī.
Kî-tin hong-chhia ū jîn-khì, khoân-pó hoat-tiān pâi tē-it,
sńg-soa chhiong-éng pàng hong-chhoe, hái-hōaⁿ se̍k-iông lâng-lâng chùi.

“Ōe-bú-iâⁿ” chêng-á chhiū-nâ lâi siat-kè, chhù-bóe-téng gîn-sek pho-lōng chiâⁿ sian-chìn,
hì-chhut piáu-ián ū té-tì, chhī-bîn gîm-chhiùⁿ ji̍t-siông-si.
Liû-hêng Im-ga̍k Tiong-sim sin-thian-tē, soan-ô͘ ta-chio̍h chō-hêng chhiūⁿ phang-siū,
àm-sî teng-hóe siám-siám-sih, chûn-káng kng-iāⁿ hó kéng-tì.
Khin-thih oân-kang tōa-kho͘-ûi, koan-kong thong-khîn lóng piān-lī,
sin-kū sî-tāi khong-kan sio-chhoàn-liân, nǹg-kòe Totoro pōng-khang ê chheⁿ-chhùi.
Kó-niá Chū-jiân Kong-hn̂g tōa-chhiú-pit, kiû-tiûⁿ khai-hòng choân-bîn lâi hiáng-siū,
sió-soaⁿ-lūn-á chháu-á-po͘ chheⁿ-leng-leng, khoán-thāi tāi-ke khin-sang hó sim-chêng.

“Tōa-káng khui-chhiùⁿ” im-ga̍k-chè, tâi-téng tâi-kha hán-hoah chê,
chèng-lâng cháu-thiàu bô hioh ê kōaⁿ-chúi, thàu-lām káng-to͘ jia̍t-chêng kiâm-phang-bī.
Ián-chhiùⁿ-hōe chi̍t tiûⁿ sòa chi̍t tiûⁿ, cheng-chhái hong-tōng bô-tè pí,
kok-chè thian-thoân sio-cheⁿ lâi, bān-chhian koa-bê lâi sio-thīn.
N̂g-sek ah-bî-á liû-liân Ài-hô-oan, àn-nāi iû-kheh sim-hoe-khui,
“ちいかわ” ū-iáⁿ chin kó͘-chui, hō͘ lâng lâu-lo̍h lân-bōng ê kì-tî.
“Tang-thiⁿ iû-lo̍k-hn̂g” piàn pá-hì, “Chhiau-jîn le̍k-pà-ông” tián-hong-sîn,
khióng-liông chúi-koài lâi chhut-ji̍p, tōa-lâng gín-á lóng kah-ì.

Chá-chêng kang-gia̍p ù-jiám ê kū siâⁿ-chhī, piàn-chòe chhiⁿ-chhioh thé-biān ê sin to͘-chhī,
Ko-hiông koan-kong khai-gán-kài, chiâⁿ-chòe kok-chè ê bú-tâi.
“Bô kóng bú-tek” chin hô-māi, bí-lē tńg-sin kài súi-khùi,
tang-sai-lâm-pak thok-tián- -khui, ngiâ-hiòng AI kho-ki cháu-pah-bí.
Jīn-chin phah-piàⁿ káng-to͘-lâng, khip-siu hái-iûⁿ sèⁿ-miā-la̍t,
sim-heng chhin-chhiūⁿ thiⁿ-tē hiah-ni̍h khoah, ǹg-bāng sè-kài kāng-sim khiā sio-óa.
Tâi-oân kiâⁿ- -chhut-khì! Sè-kài kiâⁿ óa- -lâi!
Ko-hiông káng-to͘ siōng chhia-iāⁿ, sè-kài kiò chhut lán ê miâ!

讀hōo你聽

點擊觀看 YouTube 影片

銳傳媒官方網站
https://vigormedia.tw/

銳傳媒Facebook
https://www.facebook.com/vigormedia.tw