吳欣岱一一台語需要第二次轉型正義

監察院前一站仔公佈一份調查報告，認為過去政府推動 ê 「國語政策」，壓迫台灣語言多樣性，違反國際人權公約。自國民黨來台灣到今，原本多元 ê 語言環境，到這陣除了「華語 / 北京話 / 中語」，所有 ê 本土語言 chiâu 變做聯合國教科文組織（UNESCO）認定「世界瀕危語言」。

阮兜是 1949 年來 ê 難民，實在講阮序大講 ê 語言當初時 tī 台灣是少數，這陣 soah 變做全台灣人 ê 共同語言，這實在是真怪奇。是按怎台灣社會這陣變做華語社會？這號因端 chham「華語 / 北京話 / 中語」變做是官方唯一正式 ê 語言是真有關係。

雖罔這陣有國家語言發展法，毋過就親像許慧如老師所講--ê，台灣實質上猶原「獨尊華語」，而且連「本土語言」政策，mā 無意中對台語造成第二擺 ê 無正義。

一、公部門實質「獨尊華語」

咱若繼續維持教育、升學、公共服務、就業 chiâu 用「華語 / 北京話 / 中語」，就算認定本土語言是「國家語言」，民眾猶原無實際管道 thang 使用本土語言，kan-na 是象徵性意義講，阮有尊重遮--ê 語言，無實質作用。

賴一心老師毋才會 chhōa 頭，講台語著愛成做「官方語言」才有救。

二、Tâi-gí 猶原無專責單位

客語、族語有專責 ê 客委會、原民會，台語 ê 業務 soah 分散 tī 教育部、文化部。若講著人力，客委會有 21 人、原民會 31 人，台語 kan-na 9 个人，而且愛兼做其他業務。經費 47 億，並另外兩个單位也是輸忝忝。

使用者上濟 ê 語言，人力、資源 soah 上少，若是唱議成立台語委員會、推捒台語，koh 會hō͘ 人講是沙文主義。實際上毋是欲和弱勢語言搶資源，是要求政府毋通維持霸權語言 ê 優勢，koh 造成台語面對雙面困境。

轉型正義若有心欲做，語言 ê 轉型正義就袂使 kan-na 做一半。台語需要第二次轉型正義，成立專責機構、hō͘ 伊合理 ê 資源佮「官方語言」地位。這毋是 teh 討人情，是 kā 台灣人原本 ê 權利討轉來。

咱 mā 著愛理解，咱真正 ê 敵人是體制內「獨尊華語」ê 幽魂，毋是其他 ê 本土語言。我向望有一工，台灣各族群 ê 語言會當真正平權，毋免 koh tī 家己 ê 土地，做語言 ê 二等公民。