羅漢文/張ア天
伊是台語學 ê 英雄。Tī chit ê 暗淡 ê 中治時代、ka-chài 有裕宏先。
阮大學讀語言科學（LINGUISTICS）。無不着、阮 hia 大學有語學通讀。頭 pái hian《台語白話小詞典》、也是 bē 輸乎雷 cheng 着。Tang 時仔「愛情」是 kā 日語借 ·ê？Á「多謝汝 ê 愛」hit ê「愛」是 kā 中語借 ·ê？原來台語 kā「中文」進口 ê 物件 mā 是進口 ·ê？
斟酌 kā siūⁿ：Hēⁿ ·lah！無 ·leh？雄雄知影、阮原底 ê hit ê 意識形態 mā 是意識形態。Á 册皮寫「Taioan 族語」⋯⋯。册頭 ê「踏話頭」teh 講 Tâi-oân話 kap Tâi-oân 人 ê 故事、lóng 無講着「漢人」。Che 是 1 種 kài 無簡單 ê 簡單。
路尾出板 ê《中台字詞典》oân-ná 是真 chán ê 資源。總是、無論 tī 技術上 á 是 tī 精神上、《白話小詞典》ê 次元（LEVEL）koh khah 高・第 1 高。《台日》排第 2？
（有人講《白話小詞典》teh 整理借詞 ê 時記 siuⁿ 濟台語本成無 ê音。我想、chit 点 oân-ná 講了有理。）
六冬前、林俊育長老𤆬鄭憲君兄・吳蝦米兄 kap 我去拜訪張教授。阮真福氣。
張裕宏先生注重客觀 ê 現實 kap 現象、無注重集体主觀 ê 共識。M̄-chiah 繁體中國 ê 台語專家無愛 chhap 伊（kap 王育德先生）ê 貢献。Hia ê 老師無意無意 kā 台語 chún 做中華方言（“漢語 ê 1 種”）teh 研究。裕宏先無 chhap in ê 共識、直接 kā 台語 chún 做 1 種完整 ê 語言。
咱不通 tòe 不着人。
裕宏先、望汝看顧咱太平洋西南海邊。
台灣字（白話字）版
O͘-àm-mî ê Chi̍t-lia̍p Chheⁿ: Tiuⁿ Jū-hông Sian-siⁿ（1939〜2024）
台灣字/Babuza Chû
I sī Tâi-gí-ha̍k ê eng-hiông. Tī chit-ê àm-tām ê Tiong-tī Sî-tāi, ka-chài ū Jū-hông sian.
Gún tāi-ha̍k tha̍k gí-giân kho-ha̍k. Bô m̄-tio̍h, gún hia tāi-ha̍k ū gí-ha̍k thang tha̍k. Thâu-pái hian Tâi-gí Pe̍h-ōe sió Sû-tián, iā-sī bē-su hō͘ lûi cheng--tio̍h! Tang-sî-á “ài-chêng” sī kā Ji̍t-gí chioh ê. Á “to-siā lí ê ài” hit-ê “ài” sī kā Tiong-gí chioh ê. Goân-lâi Tâi-gí kā Tiong-bûn chìn-kháu ê mi̍h-kiāⁿ mā-sī chìn-kháu ê.
Chim-chiok kā siūⁿ: Hēⁿ lah! Bô leh? Hiông-hiông chai-iáⁿ, gún goân-té hit-ê ì-sek hêng-thài mā-sī ì-sek hêng-thài.
Á chheh-phôe siá “Taioan cho̍k-gí”… Thâu-chheh ê ta̍h-ōe-thâu teh kóng Tâi-oân-ōe kap Tâi-
oân-lâng ê kò͘-sū, lóng bô kóng-tio̍h Hàn-jîn. Che-sī 1 chióng kài bô kán-tan ê kán-tan.
Lō͘-bóe chhut-pán ê Tiong-Tai-jī Sû-tián oân-ná sī chin chán ê chu-goân. Chóng--sī bô-lūn tī ki-su̍t siōng á-sī tī cheng-sîn siōng, Pe̍h-ōe sió Sû-tián ê chhù-goân koh-khah koân, tē-it koân. Tâi-Ji̍t pâi tê-jī.
(Ū lâng kóng Pe̍h-ōe sió Sû-tián teh chéng-lí chioh-sû ê sî kì siuⁿ chē Tâi-gí pún-chiâⁿ bô ê im. Góa siūⁿ chit-tiám oân-ná kóng-liáu ū tō-lí. )
6 tang chêng Lîm Chùn-io̍k tiúⁿ-ló chhōa Tēⁿ Hiàn-kun hiaⁿ, Gô͘ Hê-bí hiaⁿ kap góa khì pâi-hóng Tiuⁿ kàu-siū. Gún chin hok-khì.
Tiuⁿ Jū-hông sian-siⁿ chù-tiōng kheh-koan kap hiān-siōng, bô chù-tiōng chi̍p-thé chú-koan ê kiōng-sek. M-chiah Hoân-thé Tiong-kok ê Tâi-gí choan-ka bô-ài chhap i (kap Ông Io̍k-tek sian-siⁿ) ê kòng-hiàn. Hia-ê lāu-su bô-ì bô-ì kā Tâi-gí chún-chò Tiong-hôa hong-giân (Hàn-gí ê 1 chióng) teh gián-kiù. Jū-hông sian bô chhap in ê kiōng-sek, ti̍t-chiap kā Tâi-gí tòng-chò 1 chióng oân-chéng ê gí-giân.
Lán m̄-thang tòe m̄-tio̍h lâng.
Jū-hông sian, bāng lí khòaⁿ-kò͘ lán Thài-pêng-iûⁿ se-lâm hái-piⁿ.