【台語世界】雞仔笑白鴒鷥無腳肚仁

文／Lahjih

一陣雞仔走去後壁溝水田thit-thô。看著一陣白鴒鷥tī田--lí討食。

雞仔笑白鴒鷥：”腳腿chiah-ni̍h細支，koh無腳肚仁。無chhái你一日到暗拍拚討食。”

白鴒鷥笑笑應話：”有khah-choa̍h？食kah腳肚仁hiah大bong，猶m̄是hō͘人炸做炸雞腿。”

寓意：自由自在khah實在，khah贏hō͘人關tī籠仔內好款待。

台灣字（白話字）版

Ke-á chhiò Peh-lêng-si bô kha-tó͘-jîn

Chi̍t-tīn ke-á cháu-khì āu-piah-kau chúi-chhân thit-thô. Khòaⁿ-tio̍h chi̍t-tīn peh-lêng-si tī chhân--lí thó-chia̍h.

Ke-á chhiò peh-lêng-si, “Kha-thúi chiah-ni̍h sè-ki, koh bô kha-tó͘-jîn. Bô-chhái lí chi̍t-ji̍t kàu àm phah-piàⁿ thó-chia̍h.”

Peh-lêng-si chhiò-chhiò ìn-ōe, “Ū khah-choa̍h? Chia̍h kah kha-tó͘-jîn hiah tōa-bong, iáu m̄-sī hō͘ lâng chìⁿ-chò chìⁿ ke-thúi。”

Gū-ì: Chū-iû chū-chāi khah si̍t-chāi, khah iâⁿ hō͘ lâng koaiⁿ tī lâng-á lāi hó khoán-thāi.