【專欄】台灣敢真正有「光復節」？

文/陳月妙（台灣教授協會副會長／中正大學外文系退休教授）

薔琵風颱來矣，風佮雨攏袂細。本來拜五早起10：30，我愛參加一個批判假的台灣光復節的記者會，暗時七點閣安排參加守護台灣祈禱會，準備愛做處境分享「語言: 認同佮抵抗」，講稿嘛攏準備好矣。一時，因為風雨，攏取消矣。毋免奔波，就留佇厝內，看窗仔外的風雨，嘛觀察世情。

講實在e, 台灣並無光復節。

1945.8.15日本天皇宣佈無條件投降，是終戰日。日本本身強欲亡國，天皇就是為著避免亡國，才宣佈無條件投降。

做為日本殖民地的台灣，經歴70工無政府狀態閣攏一切井然有序，電照送、火車照開、銀票照用的社會平靜的自治優質的自我管理，本來有機會脫離殖民的枷鎖，坐上戰後建國的列車，建立家己的台灣共和國。

無疑誤，咱福爾摩沙台灣人無大聲主張家己的主權，煞陷入中華民國的「光復節」圈套內底。

自此，經歷殘酷的1947 228種族大屠殺（228 Massacre or 228 Formosa Genocide），1949百萬中國難民壓境入來台灣搶奪台灣人的土地財產，閣實施高壓無限烏暗酷刑久長38冬的軍事戒嚴。

中國國民政府1947的大屠殺，加上中華民國數十年的白色恐怖極權統治，台灣人菁英消失死傷數十萬人，就是中國國民黨當年走路流亡來台灣的「留島不留人」。

所以，1945.10.25的歴史真相是「台灣再淪陷日」。

1945.10.25中華民國軍隊來台灣，唯一的根據是盟軍最高統帥麥克阿瑟的「將軍令一號」（General Order No. 1），是代表盟軍來台灣，解除佇台灣的日軍武裝，代表盟軍受降。

這是戰後暫時的軍事佔領，無關台灣主權的移轉。

毋過，蔣軍自一開始就狼子野心，強欲獨吞台灣，就編造出台灣光復節的敘事故事，美化軍事佔領講號做是解放光復台灣，從此欺騙台灣人到今2026年。

會使講，自彼時1945.10.25，咱台灣就陷入中華的漉糊糜內底，閣愈潦陷入愈深。

咱台灣先輩千辛萬苦，慢慢靠無數先賢血汗犧牲、靠日佮暝的苦力拍拚，經濟上才閣慢慢仔徛起，政治上到此時咱才有局部有限的民主自由。

到今2026年，咱雖然有選舉自治權，毋過因為猶閣佇中華民國的框架內，咱攏袂使選毋著人，萬一若選毋著人毋著黨，咱就有陷入懸崖下滅亡的危機。

因為，佇咱台灣內底，蹛著二個國籍的人：本底的福爾摩沙台灣人佮認同中國的中國人。因此，差不多逐擺選舉尤其是總統大選抑是縣市長選舉，攏會牽連著國家認同的對抗，是一種類內戰。因為咱台灣猶毋是正式的國家。

所以，咱無武器的福爾摩沙台灣民族，只好用咱手中的選票，一步一步慢慢仔來解除中華民國框架的束縛。
真心向望咱莫閣佇中華框架內咧鉤鉤纏，趕緊用咱的選票脫離切割外來流亡殖民體制的束縛，共台灣還予台灣人，行咱台灣主體的自主建國光明路。

咱福爾摩沙台灣人的底線是：台灣是台灣，台灣是台灣人的台灣。

自決建國，是福爾摩沙台灣人的天賦基本人權。

2026.10.24 拜六

銳傳媒官方網站
https://vigormedia.tw/

銳傳媒Facebook
https://www.facebook.com/vigormedia.tw