〈專文〉1隻毛甪(lut)了了的雞母

文/劉重義

支那黨主席鄭麗文在要來遊覽美國進前的記者會，用典型外來赤藍權貴的詐騙口術嚷講：支那黨予台灣人有自由民主的生活，支那黨執政台灣著無戰爭。伊假仙祙記得，支那黨竊佔台灣了後，先屠殺台灣社會精英，然後長期藉白色恐怖統治，剝奪台灣人的政治權利，穩定假支那民國民族壓迫體制的統治和剝削；伊嘛假仙祙記得台灣人70到90年代，透過激烈的反支那黨專制腐敗的民族民主抗爭，台灣人流血流目屎才爭著目前還無正常的民主；當然伊呣識支共歷史，閣較呣知投降支共著是排隊等待被「和平屠殺和侮辱」。

鄭麗文閣較邪惡祙見笑吼講：台灣人著愛在支持咱的美國，和威脅併吞咱的支共中間，保持中立，著祙有戰爭。鄭麗文和伊的投降黨伴，是追求用台灣作投降支共的貢禮，期待支共賞賜金錢和權位，當然著做支共走狗聽支共指揮，連遮簡單的「分化台美」手段，嘛敢搬來要騙叫台灣人自我孤立。

在當前的台海情勢足清楚，有支共實質採取軍事行動在威脅台灣人，另外有鄭麗文的投降黨在台灣社會散佈投降主義，並且實質地阻擋台灣管理當局建立嚇阻支共侵略的國防力量，鄭麗文的投降黨實質上著是在鼓舞和聲援支共用戰爭威脅台灣人的生活安全。

台灣人的民族願景是要建立自由民主、公平合理的優質社會，當然是和自由民主進步的美國社會接近。美國人有過去相當支持台灣的民主鬥爭和維護台灣人人權的記憶，嘛看足清楚鄭麗文相捨連毀(sio-siá liân-hôe)賣身投靠支共擴張主義野心集團，甘願做支共的統戰卒仔，甚至痟想來動搖美國人對支共對內獨裁專政，對外侵略擴張危害和平的野蠻本質的認知。

美國人足討厭彼種無自尊的投降主義者，在美國人眼中，鄭麗文不過是排祙上《花花公子》(Playboy)夢想作兔女郎的雞女郎。我個人認為，伊不過是一隻毛已經予支共甪了了的雞母，痟想要在華府街路邊，看是呣是有機會加減啄著幾隻蟲。