〈專文〉黃國昌是該拍掉的雜質立委

文/劉重義

民眾黨主席黃國昌，家己講伊過去透早4點著起來背三民主義，顯然伊呣是足巧，卻是自少年著有心要爭出頭。

伊2024做著民眾黨不分區立委了，將立法院當作展風神出頭的舞台，親像一個三歲囡仔掛奶配仔四界展，結果和支那黨翁曉玲所主導的威風凜凜擴權法案，當然在憲法法庭予人電徦金爍爍，應驗了台灣俗語講的「三八無藥」！

伊呣知是真正足無常識，或是想出頭想徦起痟，6月18竟然在立法院放經過變造的音檔，來質詢法務部長。當日質詢結束後，民眾黨的頻道《民眾之聲》，嘛根據伊變造的音檔，以「惡檢威逼朱亞虎，法務部長聽錄音檔慌了」，為黃國昌黨主席的「出頭」造勢拐騙台灣民眾。在進步社會，像伊這種詐騙惡行被抓包了，當事人著家己知見笑，向社會悔失禮辭職落台，伊並無安呢做。有是非有理性的台灣人當然會當定位伊，是一個無誠實無自尊的雜質立委。

和柯文哲市長牽連京華城弊案的副市長彭振聲的某，7月初1跳樓自殺。黃國昌呣知想著啥，導一陣無頭無腦的小草，包圍台北地方法院，指控檢察官「害死一條人命」。拜託哩，若一定要指出害死這條人命的，柯文哲和彭振聲兩個人才是上應該受譴責的啦。

這屆立法院的親支共雜質立委，急哩立法要方便支共滲透台灣社會，要方便親支共立委去支那接受支共指令，要方便支共作票、買票直接影響台灣選舉投票結果，要放鬆對予支共吸收替支共工作的軍人叛徒的處罰。大罷免是台灣人要家己救家己台灣的大覺醒。我認為，台灣人應該愛閣擁有較闊的直接權力，會當拍掉像黃國昌這種所謂不分區的雜質立委。